Úrvalsdeildarlið Hamars í blaki tók á móti Vestra frá Ísafirði í Mizunodeild karla í dag.
Hamarsmenn mættu einbeittir til leiks og unnu fyrstu tvær hrinurnar örugglega 25-15 og 25-14. Vestramenn vöknuðu þá til lífsins og veittu hörku mótspyrnu en það dugði skammt. Vestri hafði frumkvæði í hrinunni og var yfir í stöðunni 23-20 en Hamarsmenn héldu einbeitingu og unnu hrinuna að lokum 26-24 og enn einn leikinn þar með 3-0.
Hamarsmenn eru því enn sem fyrr ósigraðir á toppi deildarinnar með fullt hús stiga.
Á meðfylgjandi myndum má sjá Hafstein Valdimarsson og Jakub Madeij upp við netið og svo Hamarsliðið fagna sigrinum í dag.
Myndirnar tók Guðmundur Erlingsson.
Facebook ummæli